பயிரை மேய்ந்த வேலிகள்..(6)-(7) ராஜ் செல்வபதி

August 17, 2016   

( பிள்ளைகளுக்காக தமது உயிரை பணயம் வைத்த தாய்மார்கள்)

மக்கள் குறிப்பாக தாய்மார்கள் தங்களை பிள்ளைகள் கடத்தி செல்லப்படுவதை தடுப்பதற்காக  தங்களால் முடிந்தளவுக்கு போராடினர். அந்த இருண்ட நாட்களில் நடந்த பலவிடயங்கள் இப்போதும் அச்சமூட்டுபவை.
வீட்டினுள் புகுந்த புலிகள் தனது மகனை பிடித்து இழுத்துசென்று வாகனத்தில் ஏற்றிக்கொண்டு புறப்பட தயாரான போது அவனது தாய் வாகனத்தின் குறுக்கே விழுந்து படுத்து அவர்கள் செல்வதைதடுக்க முயன்றார். ஆனாலும் இரக்கமற்ற அந்த வாகனசாரதி அந்த பெண்ணின் கால்களில் வாகனத்தை ஏற்றிக்கொண்டு சென்றுவிட்டார். கால்கள் முறிந்த நிலையில் மகனயும் தொலைத்துவிட்டு அந்த பெண் வெறுமனே கண்ணீருடன் தனது மிகுதி நாட்களை கழிக்க வேண்டியதாயிற்று.


தனது மகன் தன் கண் முன்னே பிடித்து இழுத்து செல்லப்படுவதை தடுக்க முயன்ற மற்றும் ஒரு தாய் ஓடிச்சென்று மகணை பிடித்து இழுத்துக்கொண்டார். விசனமடைந்த புலிகள் அந்த பெண்ணை வேகமாக தள்ளிவிட்டனர். நிலைதடுமாறி கீழே விழுந்த அந்தபெணின் நெற்றி கல்லில் அடிபட்டு இரத்தம் வழிந்த நிலையில் மயக்கமடைந்துவிட்டார். தனது மகனினதும் மனைவியினதும் நிலையை கண்டு கோபமுற்ற தந்தை மகணை பிடித்து இழுத்து செல்ல முயன்றவனை தாக்கினார். இதனை எதிர்பார்த்திராத புலிகள் கோவத்தின் உச்சிக்கே சென்று “ எங்கள் மீதே கைநீட்ட துனிந்துவிடாயா” என கத்திக்கொண்டே அந்த முதியவரை இரக்கமற்று நையப்புடைத்துவிட்டு சென்றனர். பின்னர் அந்த வயதான தம்பதியினர் உறவினர்களின் உதவியுடன் வைத்தியசாலையில் அனுமதிக்கப்பட்டனர்.


ஒரு கட்டத்துக்கு பிறகு துனிந்த மக்கள் தங்கள் பிள்ளைகளை காப்பாற்றுவதற்காக அவர்களை பிடித்துச்செல்ல வரும் புலிகள் மீது தாக்குதல்களை மேற்கொள்ள துணிந்துதனர். புலிகளிடம் பிடிபட்டாலும் மரணம் பிடிபடாவிட்டாலும் மரணம் என்னும் நிலையில் வீடுகளிலேயே இறந்துபோகலாம் என நினைத இளம் ஆண்களுக்கு துனையாக அவர்களின் பெற்றோர்களும் துணிந்துவிட்டதால் ஆட்கடத்தலுக்காக செல்லும் புலிகள் இப்போது ஆயுதங்களுடன் செல்லதொடங்கினர். இந்த நிலையில் தான் தன் கையே தன் கண்னை குற்றியதை அல்லது வேலியே பயிரை மேய்ந்ததை மக்கள் நேரடியாகவே கண்டனர். இப்படி ஒரு காட்டுமிராண்டித்தனத்தை பிள்ளை பிடிக்கசென்ற புலிகள் உச்சகட்டமாக அரங்கேற்றியிருந்தனர்.

2007ஆகஸ்ட் 27 இரவு 8.15 மணியளவில சோமலிங்கம் என்பவரது வீட்டினுள் புகுந்த புலிகள் அவருடைய 24 வயது மகனை கடத்திசெல்ல முயன்றனர். ஆனால் புலிகள் தமது வீட்டினுள் அத்துமீறி நுழையப்போவதை முன்கூட்டியே அறிந்துகொண்ட அவருடைய தாயார் தனது மகனை வேறு ஒரு உறவினர் வீட்டில் ஒழித்து வைத்துவிட்டிருந்தார். திட்டமிட்டபடியே வீட்டினுள் நுழைந்த புலிகள் தாங்கள் கடத்தி செல்ல வந்த இளைஞனை காணாது கோபமடைந்த நிலையில் வீட்டில் இருந்தவர்களுடன் கைகலப்பில் ஈடுபடதொடங்கினர். கைகலப்பு முற்றிய நிலையில் அந்த இளைஞனின் தாயரின் கால்களில் புலிகள் துப்பாக்கி பிரயோகம் செய்யதனர். கால்களிலும் கைகளிலும் பலத்த காயத்துக்கு உள்ளான லட்சுமி என்கின்ர 48 வயது பெண்மனி வைத்தியசாலையில் அதிதீவிர சிகிட்சை பிரிவில் அனுமதிக்கப்பட்டார். ஆனாலும் சிகிட்சை பலனளிக்காமல் அவர் தனது உயிரை விட வேண்டியதாயிற்று.

தொடர்ச்சியாக போர முனைகளில் ஏற்பட்ட சேதங்களால் ஆளணி பற்றாகுறைய எதிர்நோக்கிய புலிகள் அதனை ஈடு செய்வதற்காக இரக்கமற்று, மிக கொடூரமான முறைகளிலெல்லாம் ஆட்களை கடத்திச்சென்று கட்டாய ஆயுதபயிற்சியளித்து போர்முனைகளில் கொண்டு விடுவதில் அதிதீவிரமாக இயங்க தொடங்கியிருந்தனர்.

பயிரை மேய்ந்த வேலிகள்..(7)
*******************************************
(பிள்ளை பிடிக்கு உதவிய பிரித்தானிய தந்திரம்)

போர் முனைகளில் தொடர்ச்சியாக ஏற்பட்ட இழப்புகளால் பெருமளவில் ஏற்பட்ட ஆள் அணி பற்றாக்குறையை நிவர்த்தி செய்ய புலிகள் அத்தனை வழிகளையும் கையாளத் தொடங்கி இருந்தனர். பிரித்தானியரின் பிரித்தாளும் தந்திரத்தை போலவே அவர்களும் இங்கு பிரித்தாளும் தந்திரத்தை பிரயோகித்தனர்.

ஒழிந்திருப்போரை காட்டிக் கொடுத்தால் அவர்களை பிடிப்பதில்லை எனவும் , தாமாகவே பிள்ளைகளை கொண்டு வந்து ஒப்படைப்போருக்கு சலுகையாக அவர்களின் பிள்ளைகளை போர்படையணிகளுக்கு பதில் , கணணி பிரிவில் பணிபுரிய வைக்கப்படுவார்கள்.என்றெல்லாம் புலிகள் இப்போது கூறத்தொடங்கியிருந்தனர். இந்த கணணி பிரிவினருக்கு போர் பயிற்சி வழங்கப்படுவதில்லை என்று கூறப்பட்டது.
பிரித்தானியரின் பிரித்தாளும் சூழ்ச்சி இப்போது புலிகளுக்கும் கை கொடுத்தது. ஊரார் பிள்ளையை பலிட்டால் தன் பிள்ளை தானே பாதுகாக்கப்படும் என்று நம்பி தனது அயலவனுக்கே துரோகம் செய்ய சிலர் துணிந்துவிட்டு இருந்தார்கள்.
பெற்றோர் தாங்களாகவே பிள்ளைகளை கொண்டு வந்து ஒப்படைக்கின்றனர் என்கின்ற தோற்றப்பாட்டை ஏற்படுத்த , தங்கள் ஆதரவாளர்கள் மூலம் திட்டமிட்ட நாடகங்களை அவர்கள் அரங்கேற்றினர்.

தங்களது பிள்ளைகளை இயக்கத்திடம் ஒப்படைப்பதாதாக தினம் ஒருவர் வீதம் உள்ளூர் பத்திரிகையான ஈழநாத்தத்தில் புகைப்படத்துடன் புதிது புதிதாக பேட்டிக் கொடுத்துக் கொண்டிருந்தனர். சிலர் பிள்ளைகளை ஒப்படைத்ததுடன் தலைவரின் கரங்களை பலப்படுத்த தாங்களே போராளியாகிவிட்டதாக அறிக்கைகள் வி்ட்டனர். வரிப்புலி சீருடையுடன் புகைப்படத்துக்கும் போஸ் கொடுத்தனர்.

இந்த ஏமாற்று செயலை நம்பி, சிலர் தங்களது பிள்ளைகளை தாங்களே கொண்டு போய் இந்த கட்டாய ஆட் பிடியாளர்களிடம் நடக்கப்போகும் விபரீதத்தை அறியாமல் ஒப்படைத்துவிட்டு சந்தோசமாக வீட்டுக்கு சென்றனர். அத்துடன் நில்லாமல் பிள்ளைகளை ஒப்படைக்காத பெற்றோரை புலிகளுக்கு காட்டி கொடுக்கவும் முன்வந்தனர். தமது மற்றைய பிள்ளைகளை அந்த ஆள்பிடி அணிக்கு உதவிசெய்ய அனுப்பியும் வைத்தனர். சில இளைஞர்கள் புலிகளின் உண்மையான திட்டம் அறியாது தங்களை காப்பாற்றிக் கொள்ள இந்த ஆள்பிடிப்பாளர்களுடன் சேர்ந்து கொண்டு கட்டாய ஆட்கடத்தலில் அட்டகாசமாக திரிந்தனர்.

இறுதியில் புலிகள் செய்யப்போகும் விபரீதத்தை அறியாது அடுத்தவனின் பிள்ளையை பலியிட்டால் , தன்பிள்ளை தானே பாதுகாக்கப்படும் என்று நம்பி சந்தோசமடைந்து இருந்தவர்களுக்கு புலிகளின் அடுத்தடுத்த செயற்பாடுகள் பேரிடியாக தலையில் இறங்கியது.

 தொடரும்..